شوق، ہر رنگ رقیبِ سر و ساماں نکلا (غزل)

شوق، ہر رنگ رقیبِ سر و ساماں نکلا (غزل)

از مرزا اسد اللہ خان غالب

شوق، ہر رنگ رقیبِ سر و ساماں نکلا

قیس تصویر کے پردے میں بھی عریاں نکلا

زخم نے داد نہ دی تنگئ دل کی یا رب

تیر بھی سینۂ بسمل سے پَر افشاں نکلا

بوئے گل، نالۂ دل، دودِ چراغِ محفل

جو تری بزم سے نکلا، سو پریشاں نکلا

دلِ حسرت زدہ تھا مائدہِ لذتِ درد

کام یاروں کا بہ قدرٕ لب و دنداں نکلا

اے نو آموزِ فنا ہمتِ دشوار پسند!

سخت مشکل ہے کہ یہ کام بھی آساں نکلا

دل میں پھر گریے نے اک شور اٹھایا غالبؔ

آہ جو قطرہ نہ نکلا تھا سُو طوفاں نکلا

 فیس بک پر شمولیت کرنے کے لیے  نیچے دئیے گئے لنک پر کلک کریں۔ 
https://www.facebook.com/personaurdudiary